ادارے کا نظام تعلیم

ابتدائی طالب علم جو قرآن کریم کے حفظ کرنے کا ارادہ رکھتا ہے اور وہ مناسب استعداد کا حامل ہے، وہ چار سالوں میں مکمل قرآن کریم حفظ کر لیتا ہے۔ حفظ کے نصاب کو اس طور پر تقسیم کیا ہے کہ پہلے سال طالب علم قاعدہ اور ناظرہ مکمل کرتا ہے اور اس کے ساتھ ابتدائی دو سے تین پارے حفظ کر لیتا ہے، اس کے بعد کے تین سالوں میں وہ قرآن کریم حفظ بھی کرتا ہے اور پھر اس کا دور (گردان) بھی مکمل کرلیتا ہے۔
حفظ قرآن کے ساتھ ساتھ طلباء کو اسکول کا نصاب بھی پڑھایا جاتا ہے، جس میں خاص طور پر اردو، انگریزی اور ریاضی کی ابتدائی تعلیم شامل ہے۔ اس نصاب کو پڑھنے کے بعد طالب علم جماعت پنجم پڑھنے کا اہل ہوجاتا ہے۔
شعبہ حفظ کے طلباء کو اسکول کے نصاب کے علاوہ مسنون دعائیں، آدابِ معاشرت اور طہارت و نماز کے ابتدائی احکام کی تعلیم دی جاتی ہے۔

تعلیمی اوقات:
شعبہ حفظ کی پڑھائی موسم گرما میں فجر کی نماز کے متصل بعد سے شروع ہوتی ہے جبکہ موسم سرما میں نماز فجر سے ایک گھنٹہ پہلے شروع ہوتی ہے۔ ۱۲ بجے چھٹی ہوتی ہے۔ اس دوران ناشتہ کا وقفہ بھی ہوتا ہے۔ ۱۲ سے ۲ بجے تک وقفہ ہوتا ہے جس میں طلباء کھانا کھاتے ہیں اور آرام کرتے ہیں۔ اس کے بعد ظہر سے عصر تک، پھر مغرب سے عشاء تک اور عشاء کے بعد ایک گھنٹہ پڑھائی جاری رہتی ہے۔ رات کا کھانا عشاء کے بعد ہوتا ہے۔ صبح ۱۰:۳۰ سے ۱۲ بجے تک اسکول کا گھنٹہ بھی ہوتا ہے اور طلباء کو لاؤڈ سپیکر پر مختلف قراء کی تلاوت سنائی جاتی ہے۔

جماعت پنجم سے میٹرک تک پانچ سالوں پر مشتمل نصاب ہے۔ کورس کو اس طور پر مرتب کیا گیا ہے کہ ایک طالب علم جماعت دہم مکمل کرنے کے ساتھ درس نظامی کا پہلا سال (درجہ اولیٰ) مکمل کرلیتا ہے۔ جو طالب علم پنجم کی استعداد رکھتا ہو چاہے حافظ ہو یا غیر حافظ، اسے پانچ سالوں میں میٹرک تک کا نصاب پڑھایا جاتا ہے۔ پہلے سال جماعت پنجم، دوسرے سال جماعت ششم و ہفتم، تیسرے سال جماعت ہشتم، چوتھے سال جماعت نہم اور پانچویں سال جماعت دہم کا نصاب پڑھایا جاتا ہے۔ شعبہ اسکول میں فیڈرل بورڈ کا نصاب پڑھایا جاتا ہے۔ ادارہ فیڈرل بورڈ اسلام آباد سے ملحق ہے۔ طلباء فیڈرل بورڈ سے ریگولر حیثیت میں امتحان دیتے ہیں۔

تعلیمی اوقات:
شعبہ اسکول میں گھنٹے صبح ۷ بجے سے عصر تک ہوتے ہیں۔ باقی پڑھائی کے اوقات میں طلباء اپنا سبق لکھتے اور دہراتے ہیں۔

آٹھ سالہ دینی تعلیم پر مشتمل کورس، جس میں میٹرک پاس طالب علم کو داخلہ دیا جاتا ہے۔ طالب علم آٹھ سالوں میں درس نظامی کی تکمیل کے ساتھ ایم اے (بی ایس) مکمل کرلیتا ہے۔ ادارہ میں فی الوقت درجہ سادسہ (بی اے) تک کی تعلیم دی جاتی ہے۔ درجہ ثالثہ کے ساتھ گیارہویں کا نصاب اور درجہ رابعہ کے ساتھ بارہویں کا نصاب پڑھایا جاتا ہے۔ طلباء فیڈرل بورڈ سے پرائیویٹ حیثیت میں امتحان دیتے ہیں۔ ادارہ میں درجہ ثانیہ، ثالثہ اور رابعہ عربی میں پڑھائے جاتے ہیں۔

تعلیمی اوقات:
شعبہ درس نظامی میں گھنٹے صبح ۷ بجے سے ظہر تک ہوتے ہیں۔